मागे वळून पाहतांना
मागे वळून पाहतांना
विषयात बऱ्याच वैयक्तिक, कौटुंबिक, सामाजिक, भावनिक, व्यावहारिक तसेच अनेक वैचारिक पहलु दडले आहेत. सदर लेख हा प्रत्येक वय वर्गांसाठी आहे. आयुष्यात मागे वळून पाहतांना काही खंत राहू नये याचा ह्या लेखाद्वारे प्रयत्न. #आयुष्यात मागे वळून पाहताना #वयाच्या प्रवासात #जीवनप्रवास #LookingBackInLife
नमस्कार वाचक मित्रहो. आजचा विषय वाचतांना जरी गंमतीशीर वाटत असला तरी त्यामागे बऱ्याच वैयक्तिक, कौटुंबिक, सामाजिक, भावनिक, व्यावहारिक तसेच अनेक वैचारिक पहलु दडले आहेत, ज्यांचा उलगडा माझ्या वैयक्तिक विचारांतून व काही तपशिलांद्वारे पटवून देण्याचा प्रयत्न करणार आहे. सदर लेख हा प्रत्येक वय वर्गांसाठी आहे तसेच ते यातील बऱ्याच गोष्टींचा साधर्म्य वैयक्तिक अनुभवांबरोबर अनुभवू शकतील, याची खात्री वाटते. “मागे वळून पाहतांना” याचे सरळ अर्थी विश्लेषण म्हणजे “आयुष्यात मागे वळून पाहताना” असा आहे, पण हे सांगितले म्हणजे मित्रांनो विषय इथे संपत नाही तर इथून सुरु होतो, अर्थात विषयाला साजेसे मला जे मांडायचे आहे ते आपण पुढे पाहूया.
प्रत्येकाच्या आयुष्यात सर्वसाधारणपणे तीनच टप्पे येतात, ते म्हणजे बालपण, तारुण्य व म्हातारपण. सर्वात पहिले येते ते बालपण आणि हे पूर्णतः परावलंबी असते कारण या महत्वाच्या टप्प्यात आपले जीवन हे एका मातीच्या गोळ्याप्रमाणे असते, त्याला जसे घडवावे तसे घडते. बालपण हे संस्कार व शिक्षण याचा एक अभ्यासमय प्रवास असतो, ज्यामध्ये आपले आई-वडील, शिक्षक, मित्र मंडळी व कौटुंबिक परिस्थिती यांचा मोठा वाटा असतो व अनावधानाने घडलेल्या लहान-मोठ्या चुका वयाच्या आडोशात लपून जातात, परंतु बालपणांत घडलेल्या वळणदार प्रवासाचे चांगले वाईट बदल पुढील टप्प्यामध्ये दिसून येतात.
वाचकांनी सध्याच्या वयोगटाचा विचार करता आपल्या आयुष्याचा टप्पा ओळखावा व काही उणिवा राहिल्या असतील तर पूर्ण करायचा प्रयत्न करा वा काही चुका घडल्या असतील तर वेळेतच सावरावे, तसेच वर्तमानात जुन्या-नवीन चुकांची पुनरावृत्ती करण्याचे टाळावे व पुढील वाटचाल आदर्शवत करावे, अशी आशा बाळगतो.